Search

سبع سنوات زواج..

اعتراف بعد سبع سنوات جواز وهجرة، لانسانه مهرها كان تقوى الله..من انسان بيستحق انه تحتفل فيه الدنيا كلها انه عليها

لما قررت الارتباط بأميل كان قرار صعب، كحد بيعشق الوطن وروحه متعلق فيه، كبنت بكر لأهلي، ككل شي كنته لحتى اخر

يوم تركت البلد.. كيف كان ممكن اخلي كل شي وراي واروح..

اصدقاءي ، حتى المقربين جدا منا، راهنو انه رح ارجع بعد كم شهر! لانه ما بتعرفيه لجوزك كفاي، ما التقيتو غير كم مرة، كيف ممكن تتوفقي انت وهو؟ من غير ما حتى تعيشو بعض عنجد؟

كيف ممكن سوري وفلسطينية، كل الي بينهم محادثات الكترونية يكونو سند لبعض، لما علاقات حب طويلة وعميقة ما بتكمل؟ شو الي اصلا خلاني ارتبط بأميل من بين كل الناس؟

طبعا الي بيعرفني، اميل ما كان اول ارتباطاتي، كنت مخطوبة قبل هيك مرتين، بدون رباط عاطفي مع اي شخص فيهم، ولما قررنا انا واميل نكون مع بعض، كانت بمبادرة مني، حكيت لانسان اكتر من رائع انه انا معجبه بشخصيته، اسلوبه، وبحب نكون سوا! كم شخص بفلسطين كلها كان ممكن يفهم هاد الكلام، واي جريدة ما رح اكون فيها لو عملت هيك؟

طيب كمان معلومة؟ عارفين؟ مشروعي التخرج من الجامعة؟ الي اخترت فيه من اول ٣ فنانين صاعدين بالدولة؟ كان اسمه مطلوب رجل، سألت فيه وقتها اصدقاءي الي عرفتهم خلال حياتي، شو الي خلاهم ما يتزوجوني، حتى الي طلبني منهم وما وافقت عليه؟ بعتها لكتير اشخاص، حتى اللي علاقتي كانت معهم سطحية جدا..

وصفوني وقتها بصفات، لو كانت بتوصف الرجل، كان اجدع رجل بالعالم، بس لانها كانت بتوصفني ، كانت كافية لحتى اكون غير مرتبطة حتى اللحظة هاي،بسبب مجتمع اقل ما يقال عنه، ولا.. بلاش!

حكالي ابوي وقتها، لو كنت بعرف انه في انسان واحد بس هون ممكن يفهم شخصك، فنك، شغفك، ما كنت للحظة بوافق انه تتغربي.. بس اميل كان، واكثر!

لما التقيت باميل لاول مرة، بجفرا بعمان، بعد ٣ شهور من تعارفنا، حديثه مع بابا، كان كله عن مشاريعي الفنية، اعمالي، نشاطاتي، وكانه عاش معي عمر، يحكي بشغف، وكأنه مشروعه، بالمقابل في اشخاص وشباب، ما سلمت منهم لمدة سنه من تخرجي، بس لانه كان اسم مشروعي مطلوب رجل ..حتى اختي وقفوها وعلقو عليها بالجامعة، لانه مشروعي كان بيحكي عن الثغرات هاد بمجتمعنا..

علاقتنا مالها مثالية، ولحتى اللحظة فيه اختلافات بكتير امور وعادات وتقاليد، بس بيضل مدرسة لكتير من شبابنا الي مجرد الصبية انفصلت، من خطبة او زواج، او كبرت بالجيل بيصير صعب يفكر يرتبط فيها..

مجتمع سطحي، منافق ومليان مظاهر، الي الصبية الجدعة فيه صارت جريمة

0 views
  • Black Facebook Icon
  • Black Instagram Icon
  • Black LinkedIn Icon
  • Black Twitter Icon
  • Black YouTube Icon