Search
  • Aseel Tayah

في سبب

كنت حامل بالشهر الرابع بعد اربع سنوات زواج لما أجى رفيق دربي وقالي، اطلعوني من الشغل، لانه ما عاد في مشاريع، كان صرلنا كم اسبوع بالبلد الجديدة، ومديره القديم حاول بكل استطاعته انه يضل عنده، بس هو قرر انه طموحه يروح عالعاصمة الفنية..وهناك كانت البداية.. احنا التنين بغربة، ايجار بيت عالي، ومدخرات لا تكفي لاحتياجات اخر الأسبوع، تطلعنا على بعض بإيمان مطلق انه ربنا ما بينسى حدا واكيد في حكمة، الحكمة الي جمعتنا بصدفة جميلة، هاي حكمة رب كريم، هداك الأسبوع كنا ما بين نقدم على شغل، ونحضر أفلام لانه رزمة الإنترنت دفعنا حقها وما رح تكلفنا زيادة.. ما كان بنفع اخبر الأهل بفلسطين، ولا الي تحت القصف بسوريا، بيكفيهم الي فيهم، كان لازم نقرر انه هاد مشكلتنا وحدنا، وقد ما كان في اصحاب رائعة، في أمور بيكون صعب تشاركها.. لما تكون بعيد.. تحت بيتي محل خضار صاحبه لبناني، انزل اشتري من عنده الي بيكفينا للنهار، الاقيه بكل مرة معبيلي العرباي اشيا طيبة وفواكه الموسم، وكان رزق من رب العالمين، بييسره على صورة بشر، وصرت انا بس اعمل شي طبخة احطله على جنب، متل كان الي عيلة بهالغربة.. اللي شافنا هداك الأسبوع، عم ناكل ونحضر أفلام بكل رواق، وبدون هم ما كان يصدق انه باخر الشهر ممكن ونطرد من البيت، ما كان عنا اي رصيد غير الثقة برب العالمين انه موجود .. قبل ما يخلص الأسبوع حادثنا صديق انه بده يبدا يهندس بيت وبده مساعدة، وكان اول الفرج، لانه كان بدنا اي دفعة لحتى يمر كمان اسبوع، ركزنا الشغل يخلص بأسرع وقت.. كان صعب نطلب انه يدفعلنا بسرعة، بس كمان تيسير ربنا خلى الموضوع يصير بشكل عفوي وجميل.. هاد كان اول حمل الي بعد انتظار طول، وكنت رافضة اعمل اي تصوير، اشوف او اعرف اي شي حتى أولد، وبس وصلت الأسبوع ١٤، صار عندي نزيف وأجهضت بليلة ما بنساها كل العمر، سألتني الدكتورة اذا بدي اشوف الرحم، رفضت وشكرت ربنا انه ألهمني ما أتعلق بصور، وانه ما كنت حاسة بنبض، ومع كل الألم والحزن شكرته مليون مرة على نعمته بكل حالاتها، وعلى حكمته بكل صورها، وبعد هيك صار كمان إجهاضات، تأكدت انه بكل بساطة ما كانت مكتوبة تخلق وللرب الكريم سبب ومتل قصة سيدنا موسى مع الخضر، صعب نعرفها الأسباب. بعد سنه ونص حملت كمان مرة، كنت ببيت تاني، زوجي مستقر بشغله، بيت اوسع واكتر مناسب لعيلة، وشغل الي كمان ممكن ارجع عليه. واليوم عندي ريما، يلي رح تكمل ٣ سنوات قريبا، وايمان مطلق انه كمان وجودها وشخصيتها وكل تفاصيلها في الها سبب، عم احكيلكم هيك، لانه باول هالسنه كلنا بنخطط، بنحلم، بنعمل كل شي لازم لنوصل مكان معين، وبكل بساطة ممكن ما يصير، بنزعل وبنلوم، وبنحقد بدون ما نعرف ليه عنجد صار هيك. بنرتبط باشخاص وبنختلف، وبس نلاقي شركاء العمر ونشوف اللي كانو ممكن يكونو ازواجنا بنقول ياه يا رب، انا اريد وانت فعال لما تريد رحمتك وحكمتك افضل بكتيييير ما تخلو الحزن يملئ القلوب، وخلو الإيمان بغد افضل هو الي معبي قلوبنا بهاد السنه الجميلة، لو مش هاد سنه التألق، لما تتألق وتسمو، رح تقول اصلا ما كان ينفع غير هيك ما أحلى عطاءك يا رب رح احكيلكم كمان قصص، بس حبيت اذكركم بشي جميل، كشكر على إبداعكم الي بيفرحني جدا

3.9KAlaa Taieh, Mais Hijazi and 3.9K others like it 259 Comments

5 views
  • Black Facebook Icon
  • Black Instagram Icon
  • Black LinkedIn Icon
  • Black Twitter Icon
  • Black YouTube Icon